Кремлдин басма сөз катчысы Дмитрий Песков Орусиянын президенти Владимир Путин менен Украинанын президенти Владимир Зеленский август аяктаганча жолугушуусу күмөн экенин айтты. Ал 24-июлда журналисттердин суроолоруна жооп берип жатып дагы бир топ иш жасалышы керектигин билдирди.
“Биз азыр бир нерсени сөзсүз болбойт деп айтууга мүмкүн болбой турган маалда жашап жатабыз. Бирок өз кызыкчылыктарыбызды камсыз кылуу менен позицияларды жакындатуу үчүн алдыда жасалчу иштердин көлөмүн эске алганда ал аралыкты секирип өтүп кетүүнү элестетүү кыйын”,-деди Песков.
Буга чейин Киев Москвага Зеленский менен Путиндин жолугушуусун августтун аягына чейин өткөрүүнү сунуштаганы белгилүү болгон.
Тараптардан Стамбулдагы сүйлөшүүсүнүн үчүнчү айлампасы 23-июлда өткөн жана ал жарым сааттай гана созулган.
ТАСС маалымат агенттиги эки тарап жарандык жана согуш туткундарын алмашууну макулдашканын кабарлаган.
Украинанын делегациясы талкууга коюлган темалардын ичинде ок атышууну токтотуу, туткундарды алмашуу жана президенттер Зеленский менен Путиндин жолугушуусу каралганын билдирген.